Trump: Îran rastî têkçûneke mezin hatiye

RûpelNews - Serokê DYAyê Donald Trump, di dema ku danûstandinên DYA û Îranê li Îslamabadê didomiyan, got ku kapasîteyên leşkerî yên Îranê bi giranî hatine wêrankirin û diyar kir ku Tehranê "têkçûneke mezin" dîtiye û DYAyê dest bi proseya paqijkirina mînan li Tengava Hurmuzê kiriye.

Di parvekirineke li ser hesabê xwe yê medyaya civakî de, Trump diyar kir ku hêzên deryayî û hewayî yên Îranê hatine tune kirin û ku tesîsên wê yên hilberîna mûşek û dronan jî bi giranî ji holê hatine rakirin.

Daxuyaniya Trump wiha ye:

"Medya Nûçeyên Derewîn hemû baweriya xwe winda kiriye, her çend ji destpêkê ve zêde pêbaweriya wê tunebû jî. Ji ber 'Sendroma Obsesyona Trump' a wan a mezin, ew hez dikin bibêjin ku Îranê 'bi ser ketiye'; lê di rastiyê de, her kes dizane ku wan winda kiriye, û bi awayekî mezin winda kiriye. Hêza wan a deryayî nemaye, hêza wan a hewayî nemaye, sîstemên wan ên dijî firokeyan tune ne, radarên wan ji kar ketine û kargehên wan ên mûşek û dronan bi giranî hatine wêrankirin. Mûşek û dron bi xwe nemane û ya herî girîng, 'Rêberê' wan ji mêj ve ne di nav me de ye, spas ji Xwedê re. Yekane tişta ku di destê wan de maye gef e ku dibe keştîyek li yek ji mînên deryayê bixe; di vê navberê de, hemû 28 keştiyên wan ên danîna mînan li binê deryayê binav bûne. Niha, wek xêrek ji bo welatên li seranserê cîhanê, di nav de Çîn, Japonya, Koreya Başûr, Fransa, Almanya û gelekên din, em dest bi pêvajoya paqijkirina Tengava Hurmuzê dikin. Bawernekirin e, lê wêrekî an jî vîna wan nîne ku bi xwe vê yekê bikin. Gelek balkêş e ku tankerên petrolê yên vala ji gelek welatan ber bi Dewletên Yekbûyî ve diçin da ku petrolê bar bikin."