Trump di salekê de ji kriptoyê 1,2 milyar dolar qezenc kir
RûpelNews - Ofîsa Etîkê ya Hikûmeta Amerîkayê serweta Serokê Amerîkayê Donald Trump bi belgeyeke darayî ya 927 rûpelê pêk tê bi hûrgilî eşkere kir.
Trump di sala xwe ya yekem a vegera li ser kar de ji pereyê krîpto yê malbata xwe zêdetirî 1.2 milyar dolar dahat bi dest xist.
Li gorî raporê, Trump di sala 2025an de bi rêya World Liberty Financial (WLF), karsaziyeke pereyê krîpto ya ku ji aliyê malbata wî ve hatiye damezrandin, 550 milyon dolar qezenc kir. WLF di Îlona 2024an de ji aliyê her du kurên Trump û kurê Steve Witkoff, Nûnerê Taybet ê Rojhilata Navîn ve, hate damezrandin.
Dosyeyê herwiha eşkere kir ku Trump ji peymaneke lîsansê ya ji bo pereyê krîpto yê bi navê "$TRUMP" 635 milyon dolar heqdest/telîf wergirtiye, ku ev pere tenê çend saet beriya destnîşankirina wî di Çileya 2025an de hatibû destpêkirin.
Serweta wî sê qat zêde bû
Li gorî daneyên kovara karsaziyê ya Amerîkî Forbes, serweta şexsî ya Trump di navbera salên 2024 û 2026an de bi saya çalakiyên wî yên pereyê krîpto ji 2,3 milyar dolarî derket 6,5 milyar dolarî.
Qesra Spî tekez kir ku sermayeyên şexsî yên Trump ne ji aliyê wî bi xwe ve, lê ji aliyê kurê wî ve tên birêvebirin. Lêbelê, li gorî madeyên peymannameya şîrketê, mafê Trump heye ku di dawiya dema xwe ya duyemîn de kontrola tam ji nû ve bi dest bixe.
Dahatên din ên Trump çi ne?
Li gorî raporê, Trump ji klûba Mar-a-Lago ya li Florîdayê nêzîkî 77 milyon dolar û ji klûba xwe ya golfê ya li Doral a Florîdayê 122 milyon dolar qezenc kir.
Serokê Amerîkayê her wiha ji her yek ji klûbên golfê yên li Bedminster, New Jersey; Jupiter, Florida, Turnberry, Skotlanda, dahateke zêdetirî 30 milyon dolarî bi dest xist.