'Trump amade ye li Îranê piştgiriya komên çekdar bike’
RûpelNews - Rojnameya Wall Street Journal (WSJ), li ser zarê berpirsên amerîkî, destnîşanî plana Trump a ji bo Îranê kir.
Di raporê de hat gotin ku berpirsên amerîkî îdia kirine ku Trump amade ye piştgiriyê bide komên çekdar ên li Îranê yên ku amade ne çek hildin "ji bo hilweşandina rejîma Îranê."
Berpirsan diyar kirin ku Trump roja yekşemê bi serokên kurd re hevdîtin kiriye û berdewam dike ku bi serokên din ên herêmî re bicive yên ku dikarin ji "lawaziya Tehranê" sûd werbigirin, lê zêde kirin ku Serokê Amerîkayê heta niha biryar nedaye ka dê piştgiriya çek, perwerdehî an jî îstixbaratê bide komên dijberî rejîmê an na.
Trump bi Serok Barzanî û Bafil Talabanî re hevdîtin kir
Serokê Amerîkayê Trump di dawiya hefteyê de bi Serok Mesûd Barzanî û Serokê Yekîtiya Niştimanî ya Kurdistanê (YNK) Bafil Talebanî re bi rêya telefonê axivî.
Platforma nûçeyan a Axiosê di raportekê de ku xwe dispêre çavkaniyên agahdar, diyar kir ku Trump rewşa dawî ya li Îranê bi serokên kurd re gotûbêj kiriye.
Di raporê de hat îdiakirin ku Serokwezîrê Îsraîlê Benjamin Netanyahu di hevdîtineke li Qesra Spî de pêşniyar li Trump kiribû ku "kurd" li Îranê destwerdanê bikin.
Di vê navberê de, Berdevka Qesra Spî Caroline Leavitt, di bersiva pirsa derbarê van hevdîtinên navborî de got, "Serok Trump di rojên dawî de bi gelek hevalbend û hevkarên li herêmê re di têkiliyê de bûye."
Naveroka peywendiya Talebanî û Trump
Polîtbûroya YNKê îro bi serokatiya Bafil Talebanî kom bû. Xaleke girîng a civînê, peywendiya telefonî ya Bafil Talebanî bi Serokê Amerîkayê Donald Trump re bû.
Hat destnîşankirin ku di peywendiyê de Trump bi zelalî armancên Amerîkayê yên di vî şer de rave kirin.
Her wiha hat tekezkirin ku Trump spasiya rola YNKê ya li Îraqê kiriye.
Di civînê de, Bafil Talabani diyar kir ku Serok Trump derfetek pêşkêş kiriye ji bo têgihiştina armancên Amerîkayê û avakirina hevkariyeke xurt di navbera Amerîka û Îraqê de.