Serokwezîrê Almanyayê bo AfDê: Ev paqijkirina etnîkî ye!

RûpelNews -

Serokwezîrê Almanyayê Friedrich Merz di dema nîqaşeke giştî de li Bundestagê, bi tundî bertek nîşanî siyaseta koçberiyê ya partiya rastgir a tundrew Alternatîfa ji bo Almanyayê (AfD) da.

Merz, di gotina xwe ya ji bo rûniştgehên AfDê de, anî ziman ku têgeha 'remigration' (vegera koçberiyê) ya ku ji aliyê partiyê ve tê bikaranîn, di rastiyê de armanc dike ku mirovên li Almanyayê li gorî eslê wan ji hev cuda bike. Merz got, "Mebesta we ne vegerandina koçberan e, lê paqijkirina etnîkî ye."

Serokwezîr bal kişand ser kêmasiya karkeran a li Almanyayê û diyar kir ku welat nikare jiyana xwe ya aborî û civakî bêyî karkerên xwedî eslê koçber bidomîne. Merz, destnîşan kir ku kargehên pîşeyî, xizmetên tenduristiyê û sektorên din pişta xwe bi keda koçberan girê didin, armanckirina komî ya kesên ku bi awayekî qanûnî li welêt dijîn û dixebitin red kir.

Merz tekez kir ku divê cudahî di navbera koçberiya birêkûpêk û dersînorkirina kesên ku mafê wan ê mayînê li welêt tune de bê kirin. Wî diyar kir ku hikûmeta wî dê ji bo kêmkirina koçberiya nebirêkûpêk berdewam be, lê ew dê siyaseta dûrxistinê ya AfDê ya li ser bingeha eslê mirovan qebûl neke.

Serokwezîr her wiha AfD bi parastina berjewendiyên Rûsyayê tawanbar kir, banga rakirina cezayan li dijî Moskowê kir û li dijî piştgiriya ji bo Ukraynayê derket. Wî diyar kir ku bi parêzvaniya vekişîna Almanyayê ji Yekîtiya Ewropayê, partî zirarê dide berjewendiyên aborî yên welêt.

Di vê navberê de, Hevseroka AfDê Alice Weidel, di axaftina xwe de polîtîkayên hikûmetê yên koçberî û aborî rexne kirin. Weidel encama hilbijartinê ya li Saksonya-Anhaltê wek nîşana redkirina polîtîkayên partiyên desthilatdar şîrove kir û got ku AfD dê di hilbijartinên pêşerojê de armancên xwe hê bilindtir bike.

Gotara dij koçber a AfDê

Ev nîqaş piştî serkeftina AfDê di hilbijartina eyaleta Saksonya-Anhaltê de pêk hat, ku tê de partiyê bi 43.8 ji sedî dengên xwe bi awayekî zelal rêza yekemîn girt. Her çend partî nekarî piraniya mutleq bi dest bixe jî, wê ji dema damezrandina xwe ve di hilbijartineke eyaletî de rêjeya herî bilind a dengên xwe tomar kir. Partiya Merz, CDU, di vê navberê de, bi rêjeya ji sedî 17.2 li wî eyaletî encama xwe ya herî xirab tomar kir.

AfD parêzvaniya têgeha 'remîgrasyonê' dike, û dibêje ku ne tenê kesên bê mafê mayîna li welêt, lê herwiha hin koçber divê ji ber ku 'nekarîne entegre bibin' ji Almanyayê werin şandin. Rêberên partiyê tawanbariyên paqijkirina etnîkî û tundrewiyê red dikin.