Serokê Baroya Amedê: Kurd miletek bêdewlet in

RûpelNews - Li Amedê, “Konferansa Parêzerên Demokrat ên Kurd” tê lidarxistin. Di konferansê de dê mafnas du rojan behsa demokrasî, pêvajoya aştiyê, perwerdehiya bi zimanê zikmakî, tayînkirina qyûman û aliyê yasayî yê pirsgirêka kurd gotûbêj bikin. 

Konferansa 'Parêzerên Kurd ên Demokratîk', bi dirûşma 'Hiqûqa demokratîk ji bo azadî, statû û aştiyê' û bi hevkariya gelek saziyên hiqûqî, li Navenda ÇandAmedê dest pê kir.
Gelek parêzer, akademîsyen, siyasetmedar û nûnerên saziyên civaka sivîl beşdarî konferansa du-rojî bûn.

"Pirsgirêka kurd di heman demê de pirsgirêkeke yasayî ye"

Serokê Baroya Amedê, Abdulkadîr Guleç, di vekirina konferansê de axivî û got ku pirsgirêka kurd ne tenê mijareke siyasî ye, lê di heman demê de ya yasayî ye jî.

Guleç got ku, "Dema ku em li ser statuya kurdan nîqaşê dikin, em nikarin rastiyeke diyarkirî paşguh bikin. Kurd mileteke bêdewlet in. Ev nayê wê wateyê ku mirov nikare bê dewlet bijî, lê mafên kurdan ên ku ji statuya wan a neteweyî çêdibin jî hene."

"Divê bingeheke yasayî ji bo aştiyê were danîn"

Guleç, ku destnîşan kir Tirkiye di pêvajoyeke girîng re derbas dibe, tekezî li ser girîngiya bingeha danûstandinên li ser demokrasî, aşti û çareseriyê di çarçoveyeke yasayî de kir.

Guleç, ku diyar kir ku aşti ne tenê tê wateya bêdengkirina çekan, tekez kir ku mafên kurdan divê di vê pêvajoyê de bi awayekî yasayî bên parastin, û lê zêde kir ku di vî warî de berpirsiyariya herî mezin dikeve ser milê saziyên yasayî û pisporên hiqûqî.