Serok Barzanî pîrozbahiyê li boksorê kurd dike

RûpelNews - Boksorê kurd Badîn Haso di maçekê de ku li Oberhausen a Almanyayê hat lidarxistin, li hember hevrikê xwe yê meksîkî Vîktor Ramos bi ser ket, kembera şampiyoniya Navneteweyî ya WBCyê bi dest xist û di kariyera xwe de gihîşt kembera sêyemîn.

Serok Mesûd Barzanî peyameke ku li ser medyaya civakî parve kir û pîrozbahî li Badîn Haso kir:

"Ez şampiyonê kurd Badîn Haso ji bo bidestxistina kembera xwe yê sêyemîn bi serketina di Şampiyoniya Navneteweyî ya WBCyê de li Almanyayê pîroz dikim. Destxweşiyê lê dikim û hêviya serkeftinên zêdetir jê re dixwazim. Cihê xweşhalî û şanaziyê ye ku gênc û lawên kurd li meydanên werzişiyên nêvdewletî de serkeftinên mezin bidest dixin û navê kurd û Kurdistanê li cîhanê didin nasîn.”

Serkeftinên Badîn Haso

Badîn Haso bi alê Kurdistanê û wêneyê rêberê nemir ê kurd Mele Mistefa Barzanî ket rîngê.

Haso di nêzîkî 3 deqe û nîvan de bi ser ket.

Boksorê kurd berê Kembera Şampiyoniya Asyayê ya WBC û Kembera Sernavê Zîvîn a Navneteweyî ya WBC bi dest xistibû.