Şam: Hilweşandina YPGê di demek nêzîk de ye
RûpelNews - Derbarê cîbicîkirina peymana 29ê Çileyê ku di navbera hikûmeta Sûriyê û YPGê de hatibû îmzekirin, daxuyaniyeke nû hat weşandin.
Ehmed el-Hilalî, berdevkê Komîteya Serokomariyê yê berpirsiyarê cîbicîkirina peymanê û Cîgirê Waliyê Hesekê, di daxuyaniyekê de ji televîzyona Sûriyê re ragihand ku dê di demek nêz de derbarê hilweşandina YPGê de daxuyaniyeke fermî were dayîn.
Hilalî got, "Dê ragihandinek derbarê hilweşandina YPGê di demek nêz de bê kirin."
Pêşketin di yekkirina avahiyên leşkerî û sivîl de
Hilalî diyar kir ku xebat li ser yekkirina avahiyên leşkerî û ewlehiyê yên di nav YPGyê de, her wiha saziyên sivîl, bi şertên peymanê re di nav saziyên dewleta Sûriyê de berdewam dike.
Hilalî destnîşan kir ku pêvajoya yekbûnê gihîştiye "qonaxeke pêşketî" û diyar kir ku di pêkanîna li ser erdê de pêşketineke berbiçav çêbûye û qonaxên herî dijwar ên pêvajoyê li paş mane.
Hilalî her wiha ragihand ku hewl tên dayîn ji bo çareserkirina pirsgirêkên cihêreng ên ku di pêvajoyê de derketine holê, di nav de yên têkildarî dadweriyê jî.
Peymana 29ê Çileyê
Peymana ku di 29ê Rêbendanê de di navbera hikûmeta Sûriyê û YPGyê de hat îmzekirin, ne tenê dawîanîna şer, lê herwiha entegrasyona gav bi gav a avahiyên leşkerî, ewlehî û sivîl ên nav YPGê bo nav saziyên dewleta Sûriyê jî dihewîne.
Komîteya Serokomariyê ya ku ji bo peymanê hatiye avakirin, herwiha çavdêriya cîbicîkirina peymanê li ser erdê û pêvajoya entegrasyonê dike.