Şam bawernameyên "Rêveberiya Xweser" dipejirîne

RûpelNews - Turko di daxuyaniyeke fermî de ku roja Înê belav kir, diyar kir ku ev biryar li ser bingeha Qanûna Hejmar (31) a sala 2024an hatiye girtin. Armanca biryarê berçavgirtina rewşa yasayî ya xwendekarên li parêzgehên rojhilat û temamkirina projeya neteweyî ya ji bo avakirina sîstemeke perwerdeyê ya yekbûyî û berfireh e.

Ji bo ezmûnan qonaxa veguhêz

Li gorî Maddeya Yekem a biryarê, dê rê bê dayîn ku xwendekarên ku berê bi bernameyên "Rêveberiya Xweser" xwendine, tenê di salên xwendinê yên (2025-2026) û (2026-2027) de bi van bernameyan beşdarî ezmûnên giştî bibin. Her wiha Maddeya Duyem destnîşan dike ku Wezaret dê bawernameyên berê yên Rêveberiya Xweser li gorî talîmatên teknîkî yên taybet ên wezaretê bipejirîne da ku kalîte û pîvanên perwerdeyê werin parastin.

Tevlîkirina mamoste û dibistanan

Di heman çarçoveyê de, Wezîrê Perwerdeyê eşkere kir ku di proseya "yekkirina perwerdeyê" de gavên mezin hatine avêtin. Wî tekez kir ku dest bi tevlîkirina nêzîkî 38 hezar mamosteyan hatiye kirin, ku berê di saziyên Rêveberiya Xweser de kar dikirin û niha derbasî ser mîlaka perwerdeya neteweyî dibin.

Turko her wiha destnîşan kir ku 2 hezar û 350 dibistanan ji destpêka nîvê duyem ê sala xwendinê ya îsal ve dest bi sepandina bernameya hikûmetê ya Sûriyeyê ya yekbûyî kirine. Wî ev yek wekî "werçerxaneke girîng" ji bo yekkirina çavkaniya perwerdeyê û dabînkirina îstîqrarê ji bo hemû xwendekaran bi nav kir.

Projeyeke neteweyî ya yekbûyî

Wezîr di dawiya daxuyaniya xwe de tekez kir ku ev gav ne tenê biryarên îdarî ne, belkî beşek in ji "projeyeke neteweyî ya berfireh" ku armanca wê xurtkirina nasnameya neteweyî û dabînkirina derfetên perwerdeyê yên wekhev e. Ev yek dê bibe sedema girtina rûpela dabeşbûna perwerdeyê û bilindkirina kalîteya perwerdeya Sûriyeyê di bin sîwaneke neteweyî ya yekbûyî de.