Roberto Carlos bûye misilman

RûpelNews - Dema ku li Brezîlyayê bû, Ali Şahin bi Şêx Cîhad Hemade re, ku Cîgirê Serok û şêwirmendê olî yê Yekîtiya Hiqûqnasên Îslamî li Brezîlyayê (ANAJI) ye, hevdîtin pêk anî.

Şahin di peyameke xwe ya li ser hesabê medyaya civakî de diyar kir ku Hemade jê re gotiye, ew demek dirêj e bi lîstikvanê berê yê futbolê yê Brezîlyayî Roberto Carlos re yê ku di heman demê de ji bo tîma Fenerbahçeyê jî lîstibû di têkiliyê de ye.

Li gorî gotina Hemade, Roberto Carlos nêzîkî çar hefte berê serdana wî kiriye, *Şehadet* aniye û bûye misilman.

Daxuyaniya derbarê misilmanbûna Roberto Carlos de ji aliyê Ali Şahin ve û li ser bingeha gotinên Hemade hate dayîn. Heta niha ji aliyê Carlos an malbata wî ve derbarê vê mijarê de ti daxuyanî nehatiye dayîn. Carlos bi Suheyla Tahiri re zewicî ye, ku karsazeke spanî ya bi eslê xwe Fasî ye.

Roberto Carlos, yê ku di kariyera xwe de hem ji bo tîma neteweyî ya Brezîlyayê û hem jî ji bo klûbên wekî Real Madrid û Fenerbahçeyê lîstiye, di Kûpaya Cîhanê ya FIFAyê ya sala 2002an de bûye şampiyon.