RIHA: Derbarê dibistanan de biryarên nû hatin dayîn

RûpelNews - Peyameke derbarê tedbîrên zêde de li ser hesabê medyaya civakî yê Ofîsa Parêzgarê Rihayê hate parvekirin.

Di parvekirinê de hat gotin ku, li ber ronahiya bûyerên dawî yên li dibistanên navçeya Siwêregê û Mereşê, ew encam hatiye derxistin ku pêwîst e tedbîrên ewlehiyê yên ji bo dibistanan ji nû ve bên nirxandin û tedbîrên zêde bên pêkanîn.

Tedbîr hatin tundkirin

Derbarê tedbîrên ku li seranserê parêzgehê ji bo cîbicîkirinê hatine girtin, ev in:

"Hemû dê û bav û serdankerên ku ji bo civînan, ji bo agahdariyê an jî ji bo serdanê tên dibistanê, dê li ber deriyê dibistanê bên pêşwazîkirin; piştî kontroleke pêwîst a ku li wir tê kirin, dê bi agahdariya rêveberiya dibistanê destûr bê dayîn ku bikevin hundirê dibistanê.

Têketina dê û bav û serdankeran bo dibistanan dê li gorî Rêbera li ser Xizmetên Peywirên Dibistanê û Tedbîrên Ewlehiyê yên ku ji aliyê Rêvebiriya Perwerdehiya Neteweyî ya Parêzgehê ve hatine weşandin, were kirin; têketina ku li gorî van rêbazan nebe dê neyê destûrdan.

Hebûn, li bendê mayîn an jî kombûna kes û koman ên ku ti pêwendiya wan bi dibistanê re nîne, li nav dibistanê, li ber an jî li derdora hemû dibistanên li Rihayê qedexe ye. Li dijî kesên ku li dijî vê biryarê tevbigerin, dê li gorî Xala 66an a Qanûna Rêveberiya Herêmî ya Hejmar 5442 û Xala 32an a Qanûna Sûcên Biçûk a Hejmar 5326, tedbîrên cezayî werin girtin. Di vî warî de, ji aliyê yekîneyên polîs û cendirme, her wiha rayedarên dibistanan ve, dê li gorî qadên xwe yên berpirsiyariyê teftîşên pêwîst bên kirin, û dê li gorî encaman tedbîrên îdarî û yasayî bên girtin."