Rewşa dawî ya şerê Amerîka û Îranê: Ji her du aliyan daxuyaniyên girîng…
RûpelNews - Rayedarên Îranê diyar kirin ku ji ber Dewletên Yekbûyî yên Amerîka (DYA) û Îsraîlê şertên agirbestê binpê kirine, di vê qonaxê de ji nû ve vekirina Tengava Hurmuzê ji bo çûnûhatina keştiyan ne mimkun e. Seroê Parlementoya Îranê Mihemed Bekir Qalîbaf, anî ziman ku dorpêça deryayî ya DYAyê ya li ser benderên Îranê bandoreke neyînî li aboriya cîhanî dike.
Daxuyaniyên Pezeşkiyan
Di vê navberê de, Serokomarê Îranê Mesûd Pezeşkiyan diyar kir ku welatê wî ji bo danûstandinên dîplomatîk li ser masa ye, lê "binpêkirina sozan, dorpêç û gef" astengiyên sereke yên li pêşiya pêvajoyê ne. Hat ragihandin ku danûstandinên nû yên aştiyê yên ku hatibûn plankirin li Pakistanê werin kirin, hêj dest pê nekirine.
Keştiyên barhilgir hatin desteserkirin
Rayedarên Îranê piştrast kirin ku keştiyên bi navên 'MSC Francesca' û 'Epaminondas', li ser bingeha 'kontrolê' hatine desteserkirin. Di daxuyaniyeke ku ji aliyê IRGCyê ve hat weşandin de, hat îdiakirin ku keştiyan çalakiyên bêdestûr dimeşandin û hewl dabûn ku bi guhertina sîstemên xwe yên navîgasyonê ji bo derketina ji tengavê.
Wezîrê Derve yê Yewnanistanê Gîorgos Gerapetrîtîs piştrast kir ku derbarê keştiya Epamînondas a ku xwediyê wê Yewnanî ye de mudaxeleyek çêbûye; lêbelê, wî agahiyên zelal neda ka gelo keştî bi tevahî hatiye desteserkirin an na.
Amerîka agirbestê 'bêdawî' dirêj dike
Di vê navberê de, Serokê DYA Donald Trump ragihand ku wî agirbesta Amerîka û Îranê, ya ku dema wê diqediya, dirêj kiriye. Berdevka Qesra Spî Karolîne Leavîtt ragihand ku dirêjkirin bêsînor e û tu demeke nû nehatiye diyarkirin. Leavîtt her wiha diyar kir ku Trump piştgiriya dorpêça deryayî ya li dijî Îranê dike û got ku rejîma Tehranê di rewşeke stratejîk a lawaz de ye. Qesra Spî ragihand ku çalakiyên dawî yên Îranê yên desteserkirina keştiyan wek binpêkirina agirbestê nehatine dîtin, ji ber ku wan keştiyên Amerîkî an Îsraîlî nekiribûn armanc.
Fermadarê Hêzên Deryayî yên Amerîkayê dest ji kar berdide
Di nav van geşedanan de, Wezareta Parastinê ya Amerîkayê ragihand ku Sekreterê Hêzên Deryayî John Phelan dê dest ji posta xwe berde. Her çend derbarê sedema destjikarberdana wî de ti hûrgilî nehatin dayîn jî, hat ragihandin ku Cîgirê Sekreterê Hêzên Deryayî Hung Cao dê wek cîgirê wî yê demkî kar bike.
Bazarên cîhanî
Fikar di bazarên cîhanî de zêde dibin. Pispor pêşniyar dikin ku rêveberiya Amerîayê armanc dike ku pêvajoyê dirêj bike da ku bandora zextên aborî xurtir bike. Tê ragihandin ku ev geşedan nediyariyê di bazarên cîhanî de zêde dikin, di heman demê de bihayên petrolê li hin herêman bilind dibin.