Rapora îstixbarata Almanya: PKK salane 14 milyon euro kom dike
RûpelNews - Ajansa îstixbarata navxweyî ya Almanyayê rapora xwe ya sala 2025an weşand. Rapor nirxandinên berfireh ên li ser bandora rêxistinên girêdayî Tirkiyeyê li Almanyayê dihewîne.
Raporê yê 460 rûpelî zêdebûna gefên tundrew li seranserê sektorên welêt radixe ber çavan û di heman demê de nirxandinên berfireh ên li ser bandora rêxistinên girêdayî Tirkiyeyê li Almanyayê dihewîne.
Komên girêdayî Tirkiyeyê di bin pênc sernavên sereke de
Rapora 2025an a Ofîsa Federal a Parastina Destûrê (BfV), ku berpirsiyarê îstixbarata navxweyî ya Almanyayê ye, rêxistinên kes û komên bi eslê xwe tirk li Almanyayê di bin pênc sernavên sereke de vedikole: Bandora ku ji dewleta tirk tê, rêxistina PKKê, rêxistinên neteweperest û ûlkûcû, rêxistinên çepgir û tevgerên îslamî.
Li gorî raporê, hemû ev rêxistin xwedî kapasîteyeke bilind in ku bandorê li ser ewlehî, hevgirtina civakî û seferberiya siyasî ya li Almanyayê bikin.
Rêxistina PKKê ya li Almanyayê
Di raporê de, PKK wekî "rêxistina tundrew a biyanî ya herî mezin û herî birêxistinkirî" ya li Almanyayê tê nirxandin. PKK ji sala 1993an ve li Almanyayê qedexe ye, ji aliyê Yekîtiya Ewropayê ve jî wekî rêxistineke terorîst tê binavkirin.
Rapor diyar dike ku, tevî pêvajoya aştiyê ya ku bi Tirkiyeyê re dest pê kiribû, PKKê di sala 2025an de li Almanyayê çalakiyên xwe bi giranî wekî salên berê domand. Hat ragihandin ku di seranserê salê de gelek çalakî hatine organîzekirin, bi hezaran kes beşdar bûne û kapasîteya seferberiyê ya rêxistinê li Almanyayê bilind maye. Di raporê de herwiha hat destnîşankirin ku wek salên berê, di sala 2025an de hin rêvebirên PKKê ji ber sûcê endamtiya rêxistineke terorîst a biyanî bi cezayên giran ên girtîgehê hatine mehkûmkirin.
Rêxistina PKKê ya li Almanyayê ji sîstemeke hiyerarşîk pêk tê ku li ser çar sektor, neh eyaletên federal û 31 herêmên xwecihî hatiye dabeşkirin. Tê gotin ku, wekî beşek ji kampanyaya komkirina alîkariyê ya salane ya rêxistinê li welêt, di sala 2025an de 13-14 milyon euro hatine komkirin. Tê ragihandin ku bexş bi pereyê neqdî û bi awayekî rûbirû hatine komkirin.
Çalakiyên sereke yên rêxistinê li Almanyayê pîrozbahiyên Newrozê, festîvalên çandî û xwepêşandanên ku banga azadiya Abdullah Ocalan dikin, di nav xwe de dihewînin. Di raporê de her wiha hat tekezkirin ku PKK ciwanan ber bi yekîneyên xwe yên çekdar ên li Tirkiye, Iraq û Sûriyeyê ve araste dike. (DW)