Parêzgariyê daxuyanî da: Ne ji ber kurdî hatin êrîşkirin

RûpelNews - Parêzgariya Êlihê derbarê îdiayên ku li ser medyaya civakî û hin malperên nûçeyan ên online belav dibin ku malbata Işik ji aliyê cîranê wan polîs B.N. ve, ji ber ku bi kurdî diaxivîn rastî êrîşê hatine, daxuyaniyeke nivîskî weşand.

Parêzgariyê ragihand ku, piştî lêpirsînên ku ji aliyê Rêvebiriya Polîsê Parêzgehê ve hatine kirin, ti pêwendiyek di navbera bûyerê û axaftina zimanê kurdî an jî mebestên din ên îdiakirî de nehatiye tespîtkirin.

Di daxuyaniyê de wiha hat gotin: "Bûyer bi ti awayî bi axaftina zimanê Kurdî an jî mebestên din ên îdiakirî ve ne girêdayî ye."

"Nakokiyeke cîrantiyê ya demdirêj heye"

Daxuyaniya Parêzgariyê destnîşan kir ku jina Polîs B.N. wek nişteciha Mêrdînê tomarkirî ye û dê û bavê wê li Êlihê dijîn û lê zêde kir ku hatiye tespîtkirin ku ne polîs û ne jî malbata wî ji bikaranîna zimanê kurdî aciz nebûne.

Derbarê paşxaneya bûyerê de, ev şirove hat kirin:

"Hatîye tespîtkirin ku bûyera di navbera polîs B.N. ê ku li Êlihê peywirdar e û cîranên wî, malbata Işik, ku ew bi wan re di heman avahiyê de dijîn, tenê nakokiyeke şexsî ya demdirêj bû ku ji ber deng û têkiliyên cîraniyê derketibû."

Hat destnîşankirin ku polîsê navborî berê sê caran gilî tomar kiribû

Parêzgariyê ragihand ku polîs B.N. berê sê caran serî li dezgehên dadweriyê dabû, û îdia kiribû ku cîranên wî li dijî wî û malbata wî kiryarên "êrîş, gef, zordestiya devkî, zirara li mal û milk û gefên bi nîşandana çekan" pêk anîne.

Hat destnîşankirin ku ev mijar berê ji rayedarên dadwerî re hatibû pêşkêşkirin.

Di daxuyaniyê de her wiha hat gotin ku B.N., ku li Êlihê wezîfe dikir ji ber ku bajarê jina wî ye, daxwaznameyeke veguhestinê pêşkêş kiribû û ji ber nakokiya cîraniyê û bûyerên ku qewimîbûn, dixwest ji bajêr derkeve.

Parêzgariyê îdiayên ku li ser medyaya civakî û hin malperên nûçeyan belav dibin wekî "îdiayên bêbingeh ên ku rastiyê nîşan nadin û armanca wan xapandina gel e" bi nav kir, û bang li gel kir ku baweriyê bi wan neynin.