Parêzerê robot kete dîrokê: Doza yekem a ku ji aliyê hişê çêkirî ve hat amadekirin bi ser ket
RûpelNews - Şêwirmendekî serbixwe yê çavkaniyên mirovî, ji bo destpêkirina dozên yasayî ji bo wergirtina deynê xwe yê 7 hezar poundî yê mayî, nêzîkî 400 pound da fîrmayeke hiqûqê ya li ser bingeha AIyê.
Sîstema AIyê, ku di Nîsana sala borî de ji aliyê Desthilata Rêkxistina Parêzeran a Brîtanyayê (SRA) ve hatibû pejirandin, hemû amadekariyên yasayî yên beriya darizandinê bi rê ve bir. Sîstemê, wek bersiv ji îdiayên ku ji aliyê partiya berevajî ve bi rêya fîrmayeke hiqûqê ya profesyonel hatibûn pêşkêşkirin, çar îfadeyên şahidan û dosyeyeke berfireh a belgeyan ji bo rûniştina sê-saetî amade kir.
Dadgehê biryara dayîna deynî da
Doza li Dadgeha Sulhê ya Wandsworthê hate guhdarîkirin. Dadgehê biryar da li gorî daxwaza dozger û biryara dayîna deynê 7 hezar poundî da.
Philip Young, yek ji hev-damezrênerên şîrketa hişê çêkirî, diyar kir ku ev biryar di warê gihîştina dadmendiyê de pêşketineke girîng nîşan dide. Young destnîşan kir ku bi taybetî karsaziyên piçûk ji ber lêçûnên bilind ên yasayî gelek caran neçar dimînin deynên xwe jê bibin, lêbelê xizmetên bi piştgiriya hişê çêkirî dikarin alîkariyê bikin ku ev lêçûn kêm bibin.
Şêwirmendê ku doz qezenc kir her wiha got ku wî difikirî ku pêvajoya standina deynê wî bi gelemperî dê bi stres, biha û demdirêj be, lê bi saya piştgiriya kêm-mesref a ku ji hêla hişê çêkirî ve hat dayîn, wî karîbû dadmendiyê bixwaze.
"Parêzvaniya dadgehê wekî çalakiyek mirovî dimîne"
Dominic Li, parêzerê ku di danişînê de nûnertiya dozger dikir, destnîşan kir ku hişê çêkirî dosyeya dozê bi awayekî zelal û bi bandor amade kiribû. Lêbelê, Li tekez kir ku hunera axaftinê, qanihkirin û birêvebirina dozan di dadgehê de hîn jî bi giranî girêdayî jêhatîbûnên mirovî ne.
Di paşerojê de, hin pergalên AIyê li Brîtanyayê bi belavkirina agahiyên yasayî yên şaş bûbûn sedema nîqaşan. Lêbelê, biryara herî dawî nîşan dide ku AI dikare di warê hiqûqî de roleke berfirehtir bilîze, bi şertê ku di bin çavdêriyeke guncaw de be û di bin şert û mercên rast de were bikaranîn.