Pakistanê notaya dîplomatîk da Hindistanê

RûpelNews - Di daxuyaniyeke Wezareta Karên Derve ya Pakistanê de hat ragihandin ku Karûbarbirê (Chargé d'Affaires) Hindistanê li Îslamabadê hatiye vexwendin bo wezaretê û li wir li dijî hikûmeta Hindistanê protestoyeke tund hatiye nîşandan.

Li gorî daxuyaniyê, bûyer di 15ê Îlonê de, di dema tetbîqata du-salane ya Hêza Deryayî ya Pakistanê ya bi navê SEASPARK-26ê de qewimî. Pakistanê destnîşan kir ku keştiyeke Hêza Deryayî ya Hindistanê bi awayekî xeternak nêzîkî qada tetbîqatê bûye, manevrayên êrîşkar pêk aniye û di navbera her du keştiyan de lihevketin çêbûye.

Îslamabadê kiryarên Hindistanê wekî binpêkirina yasayên navneteweyî û peymana dualî ya sala 1991ê ya têkildarî tetbîqatên leşkerî û ewlehiya deryayî bi nav kir.

Wezareta Karên Derve ya Pakistanê bang li aliyê Hindistanê kir ku bi awayekî hişk pabendî yasayên navneteweyî û peymanên dualî yên ku armanca wan pêşîlêgirtina bûyerên bi vî rengî yên li deryayê ye, bimîne.