Ocalan: Têkiliyên kurdan bi xêzkirina sînorên nû nayên çareserkirin

RûpelNews - Abdullah Ocalan peyamek ji bo Konferansa Aştî û Yekbûna Demokratîk a ku li Londonê hat lidarxistin, şand.

Ocalan, ku destnîşan kir ku 'Banga wî ya ji bo Aştî û Civakeke Demokratîk' a ku di 27ê Sibata 2025an de hatibû weşandin, 'deriyê serdemeke nû vekiriye', diyar kir ku aştiyeke mayînde tenê bi rawestandina şer an jî bi rêya yek bendeke yasayî nayê bidestxistin.

Ocalan tekezî li ser pêwîstiya avakirina şert û mercên yasayî û siyasî ji bo tevlêbûna ji nû ve ya kesên ku tevlî têkoşîna çekdarî bûne nav jiyana siyasî û sivîl kir û got: "Tevlêbûna ji nû ve ya kesên ku tevlî têkoşîna çekdarî bûne nav jiyana siyasî û sivîl divê derfetê bide wan ku di nav siyaseta demokratîk de berpirsiyariyê bigirin ser xwe. Gava ku pêvajo bi dawî bibe, ev heval dê bibin beşdarên çalak di nîqaşa demokratîk, serweriya yasa û jiyana sivîl de."

"Bêyî serweriya hiqûqê, hebûn nikare bigihîje statuya yasayî"

Ocalan, ku tekez kir ku pêvajo divê bi rêziknameyên yasayî were parastin, diyar kir, "Bêyî serweriya hiqûqê, hebûn nikare bigihîje statuya yasayî; têkoşîna demokratîk bêbingeh dimîne."

Ocalan banga rêziknameyên derbarê naskirina civakeke demokratîk, pêşketina azad a ziman û çandê, berfirehkirina desthilatên dezgehên herêmî, û hemwelatiya destûrî kir.

Ocalan got, "Eger Komar demokratîktir nebe, yekbûna demokratîk jî pêk nayê," û lê zêde kir ku aştiyeke mayînde gavên dualî û garantiyên yasayî hewce dike.

"Mîsyona dîrokî ya PKKê pêk hatiye"

Di peyama xwe de, Ocalan her wiha li ser hilweşandina PKKê şîrove kir û diyar kir ku mîsyona dîrokî ya rêxistinê bi dawî bûye.

Ocalan got, "Ji ber vê sedemê, mîsyona dîrokî ya tevgera me pêk hatiye. Wekî her avahiyeke şoreşger, divê ew piştî ku mîsyona wê bi dawî dibe, ber bi formeke nû ve pêş bikeve. Helandin ne dawî û ne jî teslîmiyet e, lê derbasbûneke ber bi qonaxeke nû ya di dîrokê de ye."

Bi amajekirina li siyaseta demokratîk li şûna têkoşîna çekdarî, Ocalan diyar kir, "Divê êdî çek neyên pesinandin; divê civak were avakirin. Wî lê zêde kir, "Siyaseta demokratîk cihê stratejiya şerê rizgarîxwaziya neteweyî girtiye."

"Armanc ne veqetîn e"

Ocalan, ku amaje bi wê yekê kir ku têkiliyên di navbera kurd, tirk, ereb û farsan de bi xêzkirina sînorên nû nayên çareserkirin, "entegrasyona demokratîk" wekî modela çareseriyê pêşkêş kir.

"Armanc ne veqetîn e, lê belê avakirina demokrasiyeke rastîn a hevpar e," got Ocalan, û lê zêde kir ku çareseriya li Rojhilata Navîn ne di peydakirina netewe-dewletên nû de ye, lê belê di "peywendiyên entegrasyonîst û avakirina torên demokratîk ên herêmî" de ye.

Di dawiya peyama xwe de, Ocalan destnîşan kir ku pirsgirêka Kurd ne tenê meseleyeke kurdan e, lê belê pirsgirêkeke paşeroja hevpar a Tirkiye û Rojhilata Navîn e, û tekez kir ku pêvajo divê bi riya gavên dualî, garantiyên yasayî û rêxistina demokratîk pêşve biçe.