Mesrûr Barzanî li hemberî pêşnûmeya budçeyê ya Bexdayê bertek nîşan da

RûpelNews - Mesrûr Barzanî di daxuyaniya xwe ya ji bo rojnamevanan a derbarê pêşnûmeya budçeya federal de, bal kişand ser wê yekê ku ew hejmara navborî li ser bingeha daneyên nifûsê yên ku ji aliyê rayedarên federal bi xwe ve hatine komkirin, hatiye diyarkirin.

Serokwezîr Barzanî bi balkişandina li ser neheqiya di dabeşkirina budçeyê de, wiha got:

"Me careke din tekez kir ku para nifûsa Herêma Kurdistanê %14.14 e, tevî ku li gorî hejmartina nifûsê ya ku wan bi xwe pêk aniye jî ev rêje wiha ye. Herwiha, ev hejmar 'herêmên Kurdistanî' yên ku li derveyî îdareya Herêma Kurdistanê ne, li xwe nagire. Eger ew herêm jî dihatin hesibandin, dê rêje bi awayekî berçav bilindtir bûya. Her hejmareke di bin vê astê de neheqî ye. Lewma, li ser navê Encûmena Wezîran, me ev pêşnûme bi awayekî fermî red kir."

Serokwezîr Barzanî di bersiva pirseke nûçegihanê Kurdistan24ê ya derbarê pêkanîna kabîneya nû de, destnîşan kir ku ev pêvajo bi helwesta aliyên siyasî ve girêdayî ye û got: "Her gava ku aliyên siyasî ji bo pêkanîna hikûmetê amade bin, em jî amade ne."