Li Tehranê teqînên mezin çêbûn
RûpelNews - Hat ragihandin ku di êrîşên ku ji aliyê Amerîka û Îsraîlê ve li dijî Tehran a paytexta Îranê, hatine kirin de 13 kesan jiyana xwe ji dest dane.
Li gorî Ajansa Nûçeyan a Farsê, parêzgarê navçeya Baharistanê Abdulhamîd Şerîfî ragihand ku di êrîşeke li ser du avahiyên niştecihbûnê yên li wargeha Qale Mîr, ku beşek ji navçeya Baharîstanê ye, 13 kesan jiyana xwe ji dest dane. Şerîfî diyar kir ku operasyonên lêgerîn û rizgarkirinê li cihê bûyerê berdewam dikin.
Li Tehranê dîsa teqîn hatin bihîstin
Di vê navberê de, di şevê de li Tehranê dîsa teqîn hatin bihîstin. Hat ragihandin ku balafirên şer li esmanên bajêr hatine dîtin û teqîn bi taybetî li herêmên başûr û rojava pêk hatine.
Hat destnîşankirin ku di dema êrîşan de sîstemên parastina hewayî hatine çalakirin, lê heta niha derbarê zirara çêbûyî de ti daxuyaniyeke fermî nehatiye dayîn.
Îdiayên ku zanîngeh bûye armanc
Hat îdiakirin ku Zanîngeha Teknolojiyê ya Şerîf jî bi qasî vê sibê di êrîşên li ser Tehranê de bûye armanc. Ji çavkaniyên fermî derbarê vê îdiayê de ti piştrastkirin nehatiye wergirtin.