Li Şamê danûstandinên girîng dest pê dikin: Neçîrvan Barzanî bi merasîmeke fermî hat pêşwazîkirin

RûpelNews - Serokê Herêma Kurdistanê, Neçîrvan Barzanî, li ser vexwendineke fermî ya Serokomarê Sûriyê Ehmed Şerayê, gihîşt Şam a paytexta Sûriyê. Barzanî li Balafirgeha Navneteweyî ya Şamê ji aliyê karbidestên payebilind ên dewletê ve bi merasîmeke fermî hat pêşwazîkirin.

Piştî pêşwaziya li balafirgehê, Barzanî ber bi Qesra Serokatiya Sûriyê ve çû. Di merasîma fermî ya ku li wir hat lidarxistin de, Serokê Sûriyê Ehmed Şara pêşwaziya Neçîrvan Barzanî kir. Hebûna ala Sûriyê û ya Kurdistanê li merasîmê balkêş bû.

Têkiliyên dualî û geşedanên herêmî di rojevê de ne

Li gorî daxuyaniyek ji Serokatiya Herêma Kurdistanê, di hevdîtina di navbera Neçîrvan Barzanî û Ehmed Şara de dê têkiliyên Sûriyê bi Iraqê û Herêma Kurdistanê re, derfetên hevkariya hevpar, û geşedanên herî dawî yên li herêmê werin gotûbêjkirin.

Serdana Barzanî ya ji bo Şamê, ji dema hilweşîna rejîma Esed ve yekem serdana wî ya fermî ya ji bo Sûriyê ye. Her wiha tê payîn ku di hevdîtinê de mijarên wekî têkiliyên di navbera Hewlêr û Şamê de, geşedanên li Rojava, û rêyên xurtkirina hevkariya di navbera her du aliyan de werin gotûbêjkirin.