Li Hewlêrê lûtkeya aborî tê lidarxistin

RûpelNews - Serokê Odeya Bazirganî û Pîşesaziyê ya Hewlêrê Geylan Hacî Seîd, hûrgiliyên çalakiya du rojî ji raya giştî re parve kirin.

Geylan Hecî Seîd diyar kir ku armanca sereke ya lûtkeyê pêşxistina têkiliyên aborî û avakirina mekanîzmayeke koordînasyonê ya xurt di warên lojîstîk û bazirganiyê de ye. Tê payîn ku nêzîkî 250 heta 300 karsaz, pisporên aborî û karbidestên payebilind ji her sê aliyan beşdarî lûtkeyê bibin.

Serokê Odeya Bazirganî û Pîşesaziyê Seîd, ku tekezî li ser daxwaziya Azerbaycanê ya ji bo kûrkirina têkiliyên xwe bi Herêma Kurdistanê re di hemû waran de kir û diyar kir ku lûtke li gorî vê berjewendiya stratejîk hatiye organîzekirin, ragihand ku lûtke dê bi taybetî li ser sektorên hilberîn û pîşesaziyê bisekine û dê perspektîfên nû ji bo berfirehkirina qebareya veberhênana biyanî li herêmê werin nîqaşkirin.

Li gorî daxuyaniya Geylan Hacî Seîd, bernameya lûtkeyê ji du qonaxan pêk tê. Di roja yekem de, dê hevdîtinên asta bilind, her wiha panel û nîqaşên ku li ser diyarkirina derfetên nû yên bazirganiyê hene, werin lidarxistin.

Di roja duyemîn de, tê plankirin ku şandeyên bazirganiyê yên beşdar serdanên meydanî li fabrîqe, dezgehên hilberînê û cihên dîrokî yên li Hewlêrê bikin, bi mebesta ku ji nêz ve kapasîteya sektora taybet a herêmê bişopînin.

Ev destpêşxerî wekî hewldanekê tê dîtin ji bo avakirina pirên hevkariyê yên rasterast di navbera karsazên kurd û veberhênerên ji welatên cîran û herêmî de. (K24)