Li Hewlêr li dijî Kampa Azadîyê êrîş

RûpelNews - Endamê Lijneya Rêveber a Partiya Demokrat a Kurdistanê-Îran (PDK-Î) û Serokê Komîteya Navendî ya Pêşmerge Kawa Behramî, ragihand ku êrîşek li ser Kampa Azadîyê û derdora wê hatiye kirin.

Kampa Azadî û derdora wê li navçeya Koye ya Hewlêrê di şevê de bi dronan hatin hedefgirtin.

Behramî diyar kir, "Yek ji dronan ji aliyê hêzên hevpeyman ve li hewayê hate îmhakirin. Çar dronên din li dora kampê ketin. Di êrîşê de ti qurbanî çênebûn."

Li gorî Rûdawê, Kampa Azadî ku rastî êrîşê hat, malbatên Pêşmergeyên PDK-I, û her weha jin û zarok lê dimînin.

Di rojên dawî de êrîş zêde bûne

Di 27ê Nîsanê de, heman kamp bi du dronan hate êrîşkirin. Di heman rojê de, Kampa Surdaş a li Silêmaniyê, ku malbatên Pêşmergeyên Komele lê dimînin, jî bi du dronan hate hedefgirtin.

Di demên dawî de zêdebûnek berbiçav di êrîşên dronan û mûşekan ên li dijî Herêma Kurdistanê de heye.

Li gorî daneyan, ji 28ê Sibatê vir ve bi tevahî nêzîkî 735 êrîşên bi dron û mûşekan li herêmê hatine kirin. Hat destnîşankirin ku 30 ji van êrîşan piştî ragihandina peymana agirbestê di navbera aliyan de pêk hatine.