Li Almanya li dijî torên îslamîst pêngavek nû
RûpelNews - Di axaftina xwe ya ji bo rojnameya WELTê de, Mouhanad Khorchide destnîşan kir ku vegotina "Rojava li dijî misilmanan e" li ser TikTokê û di podcastan tê belavkirin.
Li gorî Khorchide, hin bandorkarên olî peyama ku misilman ji aliyê civakê ve hatine marjînalîzekirin û divê xwe ji yên din veqetînin, digihînin ciwanan. Bingehê vê vegotinê, vegotina 'Rojavaya xerab' û 'misilmanên bindest' e.
Khorchide got, "Peyam ev e: Li dijî gefên derve bi misilmanên din re yek bibin," û destnîşan kir ku pirsgirêkên rastîn ên wekî hestên dij misilman û cudakariyê jî ji aliyê van derdoran ve tên îstismarkirin.
"Ciwan dibin hedef"
Khorchide, Rêveberê Navenda Teolojiya Îslamî ya Zanîngeha Münsterê, got ku bi taybetî ciwan bi hêsanî di bin bandora kesayetiyên karîzmatîk ên medyaya civakî de dimînin. Li gorî nêrîna wî, ji ber kêmasiya zanîna olî, beşeke girîng a ciwanan serî li wan kesayetiyan didin ku li ser medyaya civakî wekî "otorîte" xuya dikin.
Khorchide, bi amajekirina li lêkolîna "Motra-Monitor" a Ofîsa Polîsê Krîmînal a Federal (BKA), nîgeraniya xwe anî ziman ku rêjeyeke berbiçav a misilmanên di bin 40 salî de li Almanyayê fikrên îslamî balkêş dibînin.
Giringîdanîna li ser "Îslama lihevhatî bi demokrasiyê re"
Khorchide ragihand ku wan wek bersivek li hember van geşedanan, toreke nû ya medyaya civakî ya bi navê "Muslim Aktiv und Weltoffen" ava kiriye. Armanca projeyê ew e ku têgihiştineke îslamê ya ku bi nirxên demokratîk re lihevhatî ye û li hember cîhanê vekirî ye, pêşkêşî ciwanan bike.
Khorchide got, "Mirovek dikare hem misilman û hem jî alman be," û anî ziman ku îslam li dijî demokrasî, pirengî û hevjiyanê dernakeve.
Gefên kuştinê lê tên xwarin
Khorchide, got ew jdemeke dirêj e ji ber şîroveyên xwe yên lîberal ên li ser îslamê di bin gefan de ye, her wiha destnîşan kir ku ew carinan di bin parastina tund a polîsan de dijî.
Khorchide diyar kir ku ew bi biryardarî li ser karê xwe berdewam dike û got, "Divê peyva dawî ne tundûtûjî be, lê hêza argumanê be."