Cîhan
Kaneya zêrî rûxiya! 30 kes mirin
Li herêma Nana-Mambéré ya Komara Afrîkaya Navîn ku nêzîkî sînorê Kamerûnê ye 30 karkerên kanê di encama rûxandina kaneke zêr de, jiyana xwe ji dest dan.
RûpelNews - Li qada kana zêr a li devera Abba ya Nana-Mambéréyê, ji ber sedemeke ne diyar hilweşînek çêbû. Piştî agahdarkirinê, tîmên rizgarkirinê bo cihê bûyerê hatin şandin.
Cîgirê Şaredarê Nana-Mambéréyê, Souleymane Bi, ragihand ku bi saya hewldanên tîmên rizgarkirinê û niştecîhên herêmê, di nava çend saetan de termên 30 kesan ji kana hilweşiyayî hatin derxistin. Hat ragihandin ku karkerên birîndar ji bo tedawiya bijîşkî hatine veguhestin.
Li wan deverên Komara Afrîkaya Navîn ku çalakiyên kanvaniyê yên biçûk li derveyî kontrola hikûmetê têne meşandin, ji ber nebûna tedbîrên ewlehiyê yên têrker, hilweşîna kanan pir caran rû dide.