Îranê bersiva Trump da: Xalên neyên qebûlkirin hene

RûpelNews - Îranê diyar kir ku wê heta niha bersiveke fermî nedaye pêşniyara herî dawî ya DYAyê ya ji bo bidawîkirina şer.

Li gorî raporeke Ajansa Nûçeyan a Tasnimê ku xwe spartiye ji çavkaniyeke nenas, pêşnûmaya peymana ku ji aliyê DYAyê ve hatiye pêşkêşkirin, hin bendên "nayên qebûlkirin" di navde ne.

Çavkaniyî her wiha diyar kir ku bikaranîna zimanê gefxwarinê ji aliyê rêveberiya DYAyê ve bêbandor e û lê zêde kir: "Ev yek dikare rewşê ji bo DYAyê hê xirabtir bike."

Ev daxuyanî piştî wê yekê hat ku Serokê DYAyê Donald Trump gotibû ku şer dikare bi dawî bibe eger Îran peymanê qebûl bike. Trump gotibû, "Eger ew qebûl nekin, dê bombebaran dest pê bike û mixabin, dê ji berê pir bi tundtir be."

'Lîsteya daxwazên DYAyê'

Li gorî raporeke ajansa nûçeyan a ISNAyê, berdevkê Wezareta Derve ya Îranê diyar kir ku ew pêşniyara ji aliyê DYAyê ve hatî kirin dinirxînin û dê bersiva xwe bigihînin navbeynkar, Pakistanê.

Îbrahîm Rezaî, berdevkê Komîteya Polîtîkaya Derve û Ewlehiya Neteweyî ya Meclîsa Îranê, di daxuyaniyekê de li ser platforma medyaya civakî X got ku metna pêşniyarê ya ku ji aliyê Axiosê ve hatiye weşandin "ji rastiyê dûr e." Rezayî got, "Nivîsa Axiosê ji pêşnûmayek peymanê zêdetir wekî lîsteyek daxwazên aliyê Amerîkayê dixuye."

Rayedarê îranî her wiha anî ziman ku DYA dê nikaribe bi rêya danûstandinan bigihîje tiştê ku bi rêya şer nekarîbû bi dest bixe.