Îran: Me ji Amerîkayê pêşniyarek wergirtiye
RûpelNews - Berdevka Hikûmeta Îranê Fatîme Muhaciranî ragihand ku wan ji DYA'yê derbarê pevçûna berdewam de pêşniyarek wergirtiye.
Muhaceranî diyar kir ku pêşniyar beşek ji hewldanên dîplomatîk e ku armanca wan "şikandina xetimandinê" di pevçûnê de ye.
Di daxuyaniyekê de ku li ser hesabê xwe yê medyaya civakî parve kir, Muhaceranî destnîşan kir ku Wezîrê Derve yê Îranê Ebas Arakçî jî, di civîna kabîneyê ya roja borî de, piştrast kiriye ku pêşniyar hatiye wergirtin.
Derbarê naveroka pêşniyara Amerîkayê de ti hûrgilî nehatin dayîn.
Arakçî li ser hevdîtinên xwe yên li New Yorkê axivî
Li gorî çapemeniya Îranê, Arakçî di civîna kabîneyê de derbarê hevdîtinên xwe yên dawî yên li New Yorkê de, di nav de yên bi serokên dewletên Kendavê re, agahî da.
Arakçî her wiha ew şertên ku Îranê ji bo ji nû ve vekirina Tengava Hurmuzê ji Amerîkayê re ragihandibûn, anîn ziman.
Serokê DYAyê Donald Trump jî piştî axaftina xwe ya li Civata Giştî ya Neteweyên Yekbûyî, bi serokên dewletên Kendavê re hevdîtin kiribûn.
Qeter navbeynkariyê dike
Trump berê ragihandibû ku wî pêşniyara Îranê ya ji bo ji nû ve vekirina Tengava Hurmuzê di nav hefteyekê de red kiriye.
Pêşniyara Tehranê ji nû ve vekirina Tengava Hurmuzê di nav hefteyekê de li hember rakirina dorpêça li ser benderên Îranê, ji nû ve aktîfkirina hebûnên Îranê û betalkirina cezayên petrolê pêşbînî dikir.
Arakçî, yê ku li New Yorkê danûstandinên xwe didomîne, diyar kir ku ew li benda bersivekê ji navbeynkaran in. Hatiye ragihandin ku Qeter di vê pêvajoyê de di navbera Îran û DYAyê de navbeynkariyê dike.