HUDA PARê derbarê Hizbullahê de pêngavek avêt
RûpelNews - Hate ragihandin ku parlamenterên HUDA PARê, yên ku di qonaxa dawî de pêşnûmaya qanûna çarçoveyê ya ku wek beşek ji pêvajoya tasfiye û bêçekirina PKK/KCKê hatibû amadekirin îmze kiribûn, berê pêşnûmayeke cuda amade kiribûn û tê de pêşniyar dikirin ku çarçoveya qanûnê berfirehtir bibe.
Li gorî raporeke Gokçer Tahincioglu di T24ê de, di pêşnûmaya ku di 3ê Hezîranê de pêşkêşî Serokatiya Parlamentoya Tirkiyeyê hatî kirin de, parlamenterên HUDA PARê pêşniyar kiribûn ku ne tenê rêxistinên ku biryara fesihkirinê dane, lê herwiha rêxistinên ku demeke dirêj e ti çalakî nekirine û kapasîteya xwe ya rêxistinî winda kirine jî bikevin nav çarçoveya qanûnê.
"Divê yên ku nehatine hilweşandin jî bên tevlîkirin"
Di teklîfa pêşnûmeqanûnê de, her çend hatibû diyarkirin ku armanc avakirina çarçoveyeke yasayî ji bo pêvajoya lîkîdasyona rêxistinên ku hatine hilweşandin û çekên xwe danî ye jî, ev daxuyaniya jêrîn jî hatibû tevlîkirin:
"Rêxistinên terorîst ên ku, heger biryara feshê nepejirandibin jî, demeke dirêj e serî li kiryarên terorîst an tundûtûjiyê nedane, an jî yên ku ji aliyê hejmara endaman û avaniya rêxistinî ve karakter û kapasîteya xwe ya rêxistinî winda kirine, divê ew jî bikevin nav çarçoveya vê qanûnê."
Pêşnûmeqanûnê diyar dike ku biryardayîna ka gelo ev rêxistin 'hilweşiyayî' tên hesibandin, dê ji aliyê Lijneya Çavdêrî û Nirxandinê ya ku dê were damezrandin ve were kirin û biryara dawî dê ji aliyê Serokomar ve were dayîn.
Dibe ku di dema pêvajoya komîteyê de dîsa were rojevê
Li gorî raporê, çavkaniyên di nav Parlamentoyê de diyar dikin ku dibe ku çar parlamenterên ji HUDA PARê vê pêşniyarê di dema nîqaşên komîte û giştî yên li ser pêşnûmaya çarçoveyê de careke din bînin ziman.
Çavkanî destnîşan dikin ku dibe ku hewl bê dayîn ku xalek demborîn li pêşnûmayê were zêdekirin ku armanca wê ew e ku Hizbullaha Tirkiyeyê û serokên wê jî bikevin nav çarçoveya yasayê.
Pêşnûmaya çarçoveyê pêşkêşî Parlamentoyê hat kirin
Pêşnûmaqanûna "Xurtkirina Hevgirtina Neteweyî û Yekbûna Civakî", ku ji aliyê AK Partiyê ve hatibû amadekirin, îro bi îmzeyên nêzîkî 360 parlamenteran pêşkêşî Serokatiya Parlamentoyê hat kirin.
Pêşnûmeqanûn armanc dike ku çarçoveya yasayî ji bo pêvajoya tasfiye û bêçekirina PKK/KCKê saz bike. Tê payîn ku ev yasayî di rojên pêş de li komîteyên Parlamentoyê de were nîqaşkirin.