Generalek û 2 serbazên lubnanî di êrîşeke Îsraîlê de hatin kuştin
RûpelNews - Artêşa Lubnanê ragihand ku Îsraîlê wesayîteke leşkerî ku li ser rêya Kefr Tebnît-Hardalî ya nêzîkî bajarokê Nebatiyeyê li başûrê welêt diçû, kiriye hedef û di êrîşê de sê personelên leşkerî hatine kuştin.
Daxuyaniyek ji Artêşê piştrast kir ku di êrîşa hewayî de generalek, kaptanek û leşkerek hatine kuştin. Daxuyaniyê diyar kir ku êrîşê hewldanên Lubnanê yên ji bo vegerandina aramiyê û bidestxistina agirbesteke berfireh kiriye hedef.
Artêşa Lubnanê êrîşên dawî yên Îsraîlê şermezar kirin û diyar kir ku van kiryaran biryardariya wan a ji bo parastina serweriya welêt xurtir kiriye. Daxuyaniyek ku demek kurt berî êrîşê hatibû weşandin, her wiha ragihandibû ku wesayîteke leşkerî ya ku li heman deverê dihat gerîn bûye hedef û di encamê de qurbanî çêbûne.
Agirbesta demkî hatibû dirêjkirin
Di dema pevçûnên di navbera Îsraîl û Lubnanê de, ku bi mehan e berdewam dikin, di navbera aliyan de destpêşxeriyên cuda yên agirbestê hatine gotûbêjkirin. Piştî danûstandinên bi navbeynkariya DYAyê, berê hatibû lihevkirin ku agirbestên demkî werin dirêjkirin.
Herî dawî, piştî hevdîtinên ku li Washingtonê hatin kirin, hat ragihandin ku Îsraîl û Lubnan li ser agirbesteke berfireh li hev kirine, bi şertê ku Hîzbulah êrîşên xwe rawestîne û hêzên xwe li başûrê Çemê Lîtanî vekişîne. Lêbelê, Hîzbulahê ragihandibû ku ew van şertan qebûl nake.
Tevî agirbest û hewldanên dîplomatîk, êrîşên Îsraîlê li ser herêmên cuda yên Lubnanê berdewam kirine; li gorî hejmarên Wezareta Tenduristiyê ya Lubnanê, di êrîşên ku ji 2yê Adarê ve hatine kirin de bi hezaran kesî jiyana xwe ji dest daye.
Netanyahu: Niha bi Lubnanê re agirbest nîne
Di vê navberê de, Serokwezîrê Îsraîlê Benjamin Netanyahu duh di daxuyaniyekê de îdia kir ku heta niha bi Lubnanê re ti peymaneke agirbestê nîne. Netanyahu diyar kir ku Hîzbulah li dijî pêşniyaran derketiye û anî ziman ku di navbera Îsraîl û Lubnanê de tu metneke agirbestê ya lihevkirî û temamkirî nîne.
Sererkanê Îsraîlê Eyal Zamir jî diyar kir ku divê biryara qonaxa bê di asta siyasî de were dayîn û lê zêde kir ku ew amade ne ku heke pêwîst be, qada êrîşan berfireh bikin.