Financial Times: 20 hezar girtî ji kampa Holê reviyan

Rojnameyê diyar kir ku di meha borî de, dema ku hêzên kurdî (yên ku kamp bi rêve dibirin) ji herêmê vekişiyan û hêzên ewlehiyê yên hikumeta Sûriyê li şûna wan bicih bûn, nêzîkî 20 hezar kes ji nava 24 hezar girtiyan "bi bêdengî" winda bûn.

Valahiyên ewlehiyê û qaçaxî ber bi Iraq û Tirkiyê ve

Li gorî raporê, bi hezaran girtiyan karîne di nava kun û valahiyên têlên dorgirtî de derkevin û li parêzgehên cuda yên Sûriyê belav bibin. Rojnameyê hişyarî da ku revîn tenê di hundirê Sûriyê de nemaye; hejmareke nediyar ji van girtiyan bi awayekî qaçax sînor derbas kirine û çûne axa Iraq û Tirkiyê, ku ev yek metirsiyeke mezin a ewlehiyê li ser astê herêmê çêdike.

Çavkaniyên ku rojnameyê xwe spartine wan, didin zanîn ku di kampê de bi tenê nêzî 2000 girtiyên sûrî û iraqî mane.

Sedema vê revîna mezin çi ye?

Ev pêşketina şokdar piştî lihevkirinên dawî yên di navbera Şam û Hêzên Sûriya Demokratîk (HSD) de pêk hat, ku di encamê de parastina gelek saziyên girîng û girtîgehan radestî hikumeta Sûriyê hatibû kirin.

Çavdêr di wê baweriyê de ne ku valahiya ewlehiyê ya di dema "radestkirina" kampê de çêbûye û derfeteke zêrîn daye endamên DAIŞê û malbatên wan ku birevin û careke din xwe veşêrin. Ev yek têkoşîna navneteweyî ya li dijî terorê bi pirsgirêkeke nû û metirsîdar re rû bi rû dihêle.