'Êrîşî mizgeftê kirin û 600 kes revandin'
RûpelNews - Hat ragihandin ku li bakurê Nîjeryayê, li eyaleta Nîjerê, piştî êrîşeke li ser mizgeftê di dema nimêja înê de, bi sedan kes hatine revandin.
Dîmenên ku du roj piştî êrîşê li ser Facebook û WhatsAppê belav bûyîn, hejmareke mezin jin, zarok û kal û pîr nîşan didin ku li devereke daristanî li erdê rûniştine û ji aliyê zilamên çekdar ve hatine dorpêçkirin. Di dîmenan de dengê giriyê hin zarokan jî tê bihîstin.
Niştecihên herêmî xizmên xwe nas kirin
Hate ragihandin ku êrîş di dema nimêja înê de li gundê Dekara yê li eyaleta Nîjerê pêk hatiye. Li gorî niştecihên herêmî, zilamên çekdar bi hevdemî êrîşî çendîn wargehan kirine û hejmareke mezin ji mirovan revandine.
Çar niştecihên herêmî gotin ku wan di dîmenên ku hatine weşandin de xizm û nasên xwe nas kirine. Her çend tê îdiakirin ku nêzîkî 600 kes hatine revandin jî, heta niha ev hejmar ji aliyê fermî ve nehatiye piştrastkirin.
Revandinên komî li herêmê zêde dibin
Revandinên komî yên ku li bakur rojava û bakur navendê Nîjeryayê ji bo fîdyeyê tên kirin, di van demên dawî de zêde bûne.
Komên çekdar êrîşî gund, dibistan û otobanan dikin û ji bo berdana kesên ku revandine, pereyên mezin ên fîdyeyê dixwazin.