Êrîşeke xwînî li ser pîrozbahiyên Cejna Vejînê: 17 mirî

RûpelNews - Di daxuyaniyeke ku ji aliyê Ofîsa Nîjeryayê ya Rêxistina Efûyê ya Navneteweyî ve hat weşandin de, hat ragihandin ku çekdar ên ku duh gihîştin herêma Mbalom a eyaleta Benue, di dema pîrozbahiyên Cejna Vejînê (Paskalya) de gule li derdorê reşandine.

Di daxuyaniyê de hat gotin ku di êrîşê de 17 kes hatine kuştin û gelek kes jî birîndar bûne.

Di daxuyaniyê de hat ragihandin ku di dema êrîşan de gelek kes hatine revandin û gelek mal û dikan hatine şewitandin.

Hat destnîşankirin ku bûyer şêwazek tundûtûjiya bêkontrol a li eyaletê nîşan dide û wiha hat gotin: "Em êrîşê şermezar dikin. Piştî êrîşê hîn jî malbat li hezkiriyên xwe yên windabûyî digerin."

Daxuyaniyê destnîşan kir ku li eyaleta Benue ji ber êrîşên bi vî rengî zêdetirî 500 hezar kes koçber bûne ku piraniya van kesan niha li kampên qerebalix dijîn ku gihîştina wan a av, xwarin, lênihêrîna tenduristiyê û paqijiyê kêm e.

Nîjerya ji mêj ve li deverên cuda yên welêt rastî êrîşên çeteyên çekdar û herwiha yên rêxistinên terorîst ên wekî Boko Haram û ISWAP, şaxa DAIŞê ya Afrîkaya Rojava, tê.