Di navbera HSD û Şamê de peymaneke 5 xalî hate îmzekirin

RûpelNews - Serokomarê Sûriyê Ehmed Şera û Fermandarê Giştî yê HSDê Mezlûm Ebdî di 15ê Nîsanê de li Şamê "Peymana Aştî û Hevkariyê" îmze kirin.

Peymana 5 xalî; parvekirina çavkaniyên herêmî, girêdana HSDê bi Wezareta Parastinê re û nûnertiya kurdan di saziyên dewletê de li xwe digire.

Xalên peymanê

Xalên peymanê wiha ne:

"Xala 1: Çavkaniyên Herêmî

Ji sedî 40ê çavkaniyên herêmên di bin Rêveberiya Xweser de dê ji bo berjewendiya Rêveberiya Xweser were veqetandin. Ev ji bo wê yekê ye ku ew bikaribe erkên xwe yên pêşketin û xizmetê li herêmên navborî bi cih bîne.

Xala 2: Hêzên Demokratîk ên Sûriyê

Hêzên Demokratîk ên Sûriyê (HSD) dê di bin fermandariya Wezareta Parastinê ya Komara Erebî ya Sûriyeyê de bimîne û avaniya xwe ya heyî biparêze û dê di çarçoveya sîstema parastinê ya dewletê de bixebite. Di heman demê de, ew dê taybetmendiyên xwe yên rêxistinî û îdarî li gorî berjewendiyên neteweyî biparêze.

Xala 3: Ewlekirina Statuya Karmendên Rêveberiya Xweser

Karmendên ku di saziyên Rêveberiya Xweser de dixebitin, dê di nav avaniya dewletê de li gorî prensîba nenavendiya îdarî werin ewlekirin. Ev yek maf û erkên karmendan misoger dike û ji bo baştirkirina performansa giştî dibe alîkar.

Xala 4: Yekirina Miaşan

Miaş û mûçeyên karmendên ku di hikûmeta navendî û saziyên îdarî yên xweser de dixebitin, dê bên hevrêzkirin. Armanca vê yekê ew e ku di nav hemû karmendan de li Komara Arabî ya Sûriyeyê dadwerî û wekhevî misoger bike.

Xala 5: Nûnertiya Kurdan di Wezaretan de

Nûnertiya kurdan dê di hemû wezaret û saziyên hikûmetê yên Komara Arabî ya Sûriyeyê de bê misogerkirin. Ev yek pirengiya neteweyî nîşan dide û beşdariyê di pêvajoyên biryargirtinê de di hemû astan de misoger dike.

Ev peyman wekî gaveke girîng a ber bi xurtkirina yekîtiya neteweyî û pêkanîna daxwazên gelê Sûriyeyê yên ji bo dewleteke bihêz û aram tê dîtin. Tê tekezkirin ku alî dê pabendî peymanê bin û wê bi ruhê têgihiştin û hevkariya dualî pêk bînin."