Îdia: DEM Partî dê navê xwe biguhere
RûpelNews - Li gorî nûçeya Haberturkê, DEM Partî dê wekî beşek ji "pêvajoya çareseriyê" bikeve pêvajoyeke jinûve avakirina bingehîn.
Tê payîn ku têgeha "Komara Demokratîk", a ku berê ji aliyê Ocalan ve hatibû destnîşankirin, wekî navê partiyê were pejirandin. Li gorî agahiyên ji çavkaniyên partiyê, sîstema hevserokatiyê dê bidome, dê civînên herêmî werin lidarxistin ji bo komkirina nêrînên endamên bingehîn û dê nûjenkirineke berfireh a kadroyan çêbibe. Lêbelê, tê gotin ku pozîsyona kesî ne misoger e û dê di dema pêvajoya kongreyê de hemû rol ji nû ve werin diyarkirin. Her weha tê gotin ku mijara ka dê "hiqûqa pêkhateyan" çawa were birêvebirin, hê jî di nav mijarên nîqaşê de ye.
Di nûçeyê de ev agahî hatin dayîn:
"Navê partiyê dê were guhertin. Tê gotin ku navê nû dê 'Komara Demokratîk' li xwe bigire. Nêrîna ku divê têgeha 'Komar' ji nû ve were pênasekirin û ku divê zanist û siyaseta demokratîk cihê çekan bigirin, tê pêşniyarkirin. Li gel vê guhertinê, armanc ew e ku li gorî hedefa bûna 'partiyeke Tirkiyeyî' bigihîjin beşên civakî yên berfirehtir."
KCD, HDK û DBP dê werin girtin
Di serdema nû de, tê plankirin ku siyaset di bin sîwaneke yekane de were rêvebirin. Di vê çarçoveyê de, girtina saziyên weke; Kongreya Civaka Demokratîk (KCD), Kongreya Demokratîk a Gelan (HDK) û Partiya Herêmên Demokratîk (DBP), di rojevê de ye.
Lêbelê, tê ragihandin ku mijara ka dê statuya yasayî ya saziyên pêkhatî çawa were bidawîkirin an veguherandin, hîn jî di nav partiyê de tê nîqaşkirin. Tê çaverêkirin ku biryarên ku bên girtin di stratejiya hilbijartinê de jî bên nîşandan. Li gorî vê yekê, dê rê ji bo pêkhateyên çepgir were vekirin ku di bin sîwana yek partî û bi navê wê partiyê de tevlî siyasetê bibin. Modelek tê nirxandin ku li gorî wê parlamenterê ji lîsteyên DEMê hilbijartî, piştî ketina parlamentoyê nikaribe wek parlamenter ji bo partiyeke din berdewam bike.
Berdevka DEM Partiyê bersiva îdiayan da
Berdevka DEM Partiyê Ayşegul Dogan ji bo Ilke TVyê ragihand ku di komîteyên peywendîdar de derbarê rojeva kongreyê de ti nirxandin nehatiye kirin.
Dogan got, "Di komîteyên peywendîdar ên partiya me de, berî her tiştî di Komîteya me ya Rêveberiya Navendî de, derbarê rojeva kongreyê de ti nirxandin nehatiye kirin" û lê zêde kir ku derbarê guhertina nav, avahî an jî rêveberiya partiyê de ti biryar nehatiye gotûbêj kirin.