Daxwaz li ser sêrbaziyê zêde dibe: Xelkê berê xwe da niviştan
RûpelNews - Ji ber bandorên şer û zehmetiyên aborî yên li Rûsyayê, beşeke girîng a nifûsê serî li sêrbazî, fal û tiştên rûhanî dide.
Li gorî raporteke Reutersê, Natalia Malinovskaya, ku xwe wekî "sêrbaz" bi nav dike, got ku wê gelek daxwaz wergirtine, bi taybetî ji leşkerên ku beşdarî şerê li Ukraynayê dibin. Malinovskaya diyar kir ku ew gelek xizmetan pêşkêş dike, ji efsûnên evînê bigire heta rîtuelên ji bo "parastina li dijî enerjiya neyînî".
Her çend baweriyên mîstîk di dirêjahiya dîrokê de bi Dêra Ortodoks a rûsî re bi hev re jiyane jî, di demên dawî de ew bi awayekî berbiçav ji nû ve zindî bûne.
Ji sedî 85ê nifûsê li efsûnê geriyane
Li gorî rapirsiyeke ku ji aliyê saziya lêkolînê ya bi piştgiriya dewletê VTsIOM ve hatiye weşandin, ji sedî 85ê rûsiyan di jiyana xwe de qet nebe carekê li efsûn an jî kiryarên bi vî rengî geriyane.
Heman rapirsiyê eşkere kir ku nêzîkî nîvê nifûsê bawer dike ku hin kes dikarin paşerojê bibînin an jî xwedî hêzên serxwezayî ne. Hat destnîşankirin ku ev hejmar li gorî sala 2019an bi awayekî berbiçav zêde bûye.
Li gorî pisporan, aloziyên jeopolîtîk ên zêde û zehmetiyên aborî fikarê di nav civakê de zêde dikin û baweriyên weha dikin 'mekanîzmayeke parastinê ya psîkolojîk'.
Li gorî daneyên xerîdaran, di sala borî de daxwaza ji bo gogên krîstal û berhemên mîna efsûnan ji du qatan zêdetir bûye. Tê ragihandin ku firotina stûnên darîn, ku tê bawerkirin li dijî ruhên pîs diparêzin, çar qat zêde bûye.
Tê zanîn ku eleqeyeke mezin ji bo berhemên wekî bixûr, qertên tarotê û kevirên obsîdyanê di dikanên wekî "Dikana Sêrbazan" a li Moskowê de heye.
Dêrê bertek nîşan da
Lêbelê, ev daxwaz rastî rexneyan jî hatiye. Serokê Dêra Ortodoks a Rûsî Patrîk Kirîl, çalakiyên falgirtin û medyûmiyê wekî "girêdayî hêzên şeytanî" bi nav kir.
Digel ku Kirîl got ku kiryarên weha "bandoreke manîpulatîf" li ser civakê çêdikin, hin parlamenteran jî pêşnûmayasayek pêşkêş kiriye ku qedexekirina reklamên astrolojî û xizmetên mîna wê pêşniyar dike.