Cihûyê kurd ê ku 11 salan li Herêma Kurdistanê hatibû girtin, vegeriya Îsraîlê

RûpelNews - Hassin diyar kir ku ew di sala 2015an de ji bo serdana malbata xwe û ji bo xwebexşî alîkariya hêzên kurdî yên ku li dijî DAIŞê şer dikin, çûye herêmê. Hassin, piştî bûyereke li Silêmaniyê ku bû sedema mirina ajokarekî taksiyê, hate girtin, bi tawana kuştinê hate mehkûmkirin û cezayê îdamê lê hate birîn.

Hassin îdia kir ku, dema ajokarê taksiyê fêm kir ku ew îbranî diaxive, ajokarê gef lê xwar ku wî teslîmî DAIŞê bike û wî ji bo xweparastinê ew kiriye. Lêbelê, ev vegotin tenê li ser daxuyaniya Hassin bi xwe ava bûye.

Li gorî medyaya Îsraîlê, cezayê îdamê piştî lihevkirineke darayî ya ku bi malbata rehmetî re hatibû kirin, hat betalkirin û cezayê wî bo 15 salên zîndanê hat guhertin. Hassin di 16ê Îlonê de piştî ku Herêma Kurdistanê cezayê wî yê mayî ji ber reftarên baş kêm kir, hate berdan. Ew du roj şûnde gihîşt Îsraîlê.

Di daxuyaniyekê de ku piştî berdana xwe da, Hassin azadiya xwe wekî "derfeteke duyem a jiyanê" bi nav kir.