Amerîkayê êrîşî keştiyeke petrola Îranê kir

RûpelNews - Li gorî daxuyaniya CENTCOMê, hêzên DYAyê roja Çarşemê êvarê tankereke petrolê ya bi ala Îranê bêbandor kirin ku hewl dida bi binpêkirina dorpêça DYAyê bigihêje bendereke Îranê.

CENTCOMê diyar kir ku tankera vala, ku di avên navneteweyî de ber bi bendereke li Kendava Omanê ve diçû, çend caran hatiye hişyarkirin, lê piştî hişyariyan, DYAyê çend gule li ser rêça keştiyê reşandine. Li gorî daxuyaniyê, gule ji aliyê balafireke şer a deryayî ve hatine reşandin ku ji keştiya USS Abraham Lincoln hatiye avêtin. CENTCOMê ragihand ku tankera M/T Hasna êdî ber bi Îranê ve naçe.

Daxuyanîya CENTCOMê wihaye: 

"Di 6ê Gulanê de, saet 4:00 PM ET, hêzên Amerîkî yên ku li Kendava Omanê dixebitin, tankereke petrolê ya vala ya bi ala Îranê ku hewl dida bigihêje bendereke Îranê, bi sepandina tedbîrên dorpêçkirinê bêbandor kirin.

Hêzên Fermandariya Navendî ya Amerîkî (CENTCOM) keştiya M/T Hasna ku di avên navneteweyî de ber bi bendereke Îranê ve diçû, tespît kirin. Hêzên Amerîkî gelek hişyarî dan keştiyê û ragihandin ku keştiya bi ala Îranê dorpêça Amerîkî binpê dike.

Dema ku ekîba Hasna guh neda hişyariyên dubare, bi gulebarana balafireke şer a F/A-18 Super Hornet a Hêzên Deryayî yên Amerîkî ku ji keştiya balafirhilgir a USS Abraham Lincoln (CVN 72) hate avêtin, bi karanîna topa xwe ya 20 mm, stûna tankerê hate neçalakkirin. Hasna êdî ber bi Îranê ve naçe.

Abloka Amerîkî ya li dijî keştiyên ku hewl didin bikevin benderên Îranê an jî ji wan derkevin, bi tevahî di meriyetê de ye. Hêzên CENTCOMê rêziknameyan bicîh tînin..." "Em bi biryardarî û profesyonel tevdigerin da ku pabendbûnê misoger bikin."